ಶ್ರೀ ಸಂಸ್ಥಾನವನ್ನು ಪ್ರವೇಸಿಸುವಂತೆಯೇ 40 ಅಡಿ ಎತ್ತರದ ಭವ್ಯ ಕಲಾತ್ಮಕ ರಾಜಗೋಪುರ ರಚನೆ ನಮ್ಮನ್ನು ಸ್ವಾಗತಿಸುತ್ತದೆ. ವಿಶಾಲವಾದ ಪುರಾಣ ಇತಿಹಾಸವನ್ನು ಪರಿಚಯಿಸುವ ಚಿತ್ರಕಾವ್ಯಗಳು ನಮ್ಮ ಮನ ಸೂರೆಗೊಳ್ಳುತ್ತದೆ. ಪೂರ್ವ ಭಾಗದಲ್ಲಿ ಹನುಮದ್ ವಿಲಾಸದ ಕಥಾನಕ ಮೋಹಕವಾಗಿ ಚಿತ್ರರೂಪ  ತಳೆದಿದೆ. ದಕ್ಷಿಣ ಭಾಗದಲ್ಲಿ ಶಿವಲೀಲೆಯ ಕಥೆಗಳು ಚಿತ್ರಮಾಲಿಕೆಯಲ್ಲಿ ರಾರಾಜಿಸುತ್ತದೆ. ಪಶ್ಚಿಮ ಭಾಗದಲ್ಲಿ ಗುರು ದತ್ತಾತ್ರೇಯರ ಮಹಿಮೆಯನ್ನು ಸಾರುವ ಕಲಾಕೃತಿಗಳು ನಮ್ಮ ಗಮನ ಸೆಳೆಯುತ್ತದೆ. ಉತ್ತರ ಭಾಗದಲ್ಲಿ ಶ್ರೀಮನ್ನಾರಾಯಣನ ಮೂರ್ತಿ ಕಲಾವೈಭವಕ್ಕೆ ಸಾಕ್ಷಿಯಾಗಿದೆ. ಒಟ್ಟು 64 ಶಿಲ್ಪಗಳು 64 ಕಲೆಗಳನ್ನು ಧ್ವನಿಸುತ್ತದೆ ಎನ್ನುವುದು ಪೂಜ್ಯಶ್ರೀಗಳ ಇಂಗಿತ.

ಅಲ್ಲಲ್ಲಿ ಕಾಣುವ ಉಬ್ಬು ಚಿತ್ರಗಳು ಪುರಾಣದ ವಿವಿಧ ಕಥೆಗಳನ್ನು ಉಲ್ಲೇಖಿಸುತ್ತದೆ. ಇಲ್ಲಿಯ ಕಲಾ ನೈಪುಣ್ಯದ ವರ್ಣ ಚಿತ್ರಗಳು ಪೌರಾಣಿಕ ಲೋಕವನ್ನೇ ನಮ್ಮ ಕಣ್ಣೆದುರು ಸೃಷ್ಟಿಸುವಂತಿದೆ.